Politiki

Rusizi: Njyanama igiye kwiga ku bwegure bwa Mayor Harerimana.

Sangiza inshuti iyi nkuru kuri:

Nyuma yaho Harerimana Frederic atangarije ko yeguye ku mwanya w’umuyobozi w’akarere ka Rusizi komite ya njyanama y’aka karere iratangaza ko kuri uyu wakabiri tariki ya 15 ari bwo iterana igasuzuma ibaruwa yabushyikirije maze ikemeza cyangwa igahakana ubwegure bwe.

Mu rukerera rwo kuri iki cyumweru tariki ya 13 Gicurasi 2018 ni bwo hasakaye amakuru yuko umuyobozi w’akarere ka Rusizi Harerimana Frederic yaba yeguye ku mirimo ye,ibi yaje kubyemerera TV/Radio One ,aho yahamije ko yeguye ku mpamvu ze bwite.

Nubwo kwegura k’umuyobozi runaka gukunze kugirwa ibanga ,muri aka akarere ka Rusizi hari hasanzwe hari ubwumvikane buke muri komite nyobozi y’akarere aho byavugwaga ko umuyobozi wungirije ushinzwe ubukungu atavugaga rumwe n’umuyobozi w’aka karere cyane cyane mu gihe cyo gufata ibyemezo bimwe na bimwe birimo ibyo mu micungire y’amakoperative nkuko TV/Radio byagiye bibitangaza mu bihe bitandukanye.

Bimwe mu bibazo Meya Frederick asize adakemuye muri aka karere birimo icy’imishinga yashowemo amafaranga ariko ikadindira harimo:Guest house ya Nkombo,ubwato perezida wa Repubulika yemereye abaturage bo ku kirwa cya nkombo ariko bukaba bwarabahombeye,hatibagiranye n’imbuga yashijwe muri ako karere bivugwa ko izajya iparikaho amakamyo igatangwaho asaga miliyoni 150 Frw ariko ikaba ntacyo yakemuye dore ko amakamyo agiteza umwanda mu mujyi wa Kamembe,ikindi cyagarutsweho cyane ni uko buri muyobozi wasuraga aka karere hagarukaga ku kibazo cy’umwanda,urugero ruheruka ni urwa minisitiri w’ubutegetsi bw’igihugu Francis Kaboneka ubwo tariki ya 11/01/2017 yaraga aka karere maze agatangaza ko yahasanze umwanda mwinshi ndetse anakomoza ku bana bagwingiye abandi barwaye bwaki.

Perezida wa njyanama y’akarere ka Rusizi Mvuyikongo Jean Claude yatangaje ko bamaze kwakira ibaruwa y’ubwegure bw’uyu muyobozi,yirinze kwerura icyo bo baba bashinja Harerimana ahubwo yemeza ko kuwa kabiri tariki ya 15 Gicurasi 2018 ari bwo inama njyanama izaterana maze ikemeza ubwegure bwe no gucukumbura niba nta kindi cyihishe inyuma y’uko kwegura.

Harerimana Frederic yari amaze imyaka 3 ku mwanya w’umuyobozi w’akarere ka Rusizi dore ko yagiye kuri uyu mwanya mu mwaka wa 2015.

Ibitekerezo: 0

pre-moderation

Icyitonderwa, igitekerezo cyawe kiragaragara ku rubuga nyuma yo gusuzumwa n'abakozi ba TV1.

Uri nde?
Igitekerezo cyawe

Andika hano

TV1 APP

Kurikira TV1 kuri Telephone yawe igendanwa:

- Usome Amakuru ashyushye kandi agezweho
- Wumve Radio 1 LIVE
- Urebe TV1 LIVE
- Utwoherereze Inkuru
- Urebe ibihumbi nibihumbi bya Video kuri VoD

downloadinga APP ya TV1 NONAHA!